गेल्या रविवारी आपल्या लब्बाड 'गोलुमोलु'वर मी लिहिलेला लेख वाचल्याचे तुम्हाला आठवत असेलच. मज्जा आली ना वाचायला!? बऱ्याच वाचकांनी लेख आवडल्याचे मला कळविलेसुद्धा आहे. त्याकरिता मी सर्वांचा आभारी आहे.
सदर लेखात मी 'टकाटक' हा शब्द वापरला होता. बऱ्याच वाचकांना तो शब्द फारच आवडला. फारच गंमत वाटली त्यांना तो शब्द वाचताना. कित्येकांनी तर प्रतिसाद देताना फक्त 'टकाटक' हाच एक शब्द लिहून आणि पुढे 'खो! खो!' हसण्याची स्मायली टाकून मला पाठविले होते. ज्या लोकांना तो शब्द समजला आणि ज्यांना नाही समजला, त्यांनाही ह्या 'टकाटक' शब्दाची मजा लुटताना काहीच अडचण आली नाही. उलट मला खात्री आहे, की बऱ्याच वाचकांनी आता आपल्या बोलण्यात 'टकाटक' हा शब्द वापरायला सुरवात सुद्धा केली असेल. हा! हा!! हा!!
एका मराठी संकेतस्थळावरसुद्धा आपल्या 'गोलुमोलु'चा लेख मी प्रसिद्ध केला होता. काल तेथील एका वाचकाने मला प्रश्न केला, की हा 'टकाटक' शब्द काय आहे? मी तर पहिल्यांदाच ऐकला हा शब्द!! त्यांच्या शंकेवर लिहिलेले स्पष्टीकरण मी जसेच्या तसे खाली देत आहे.
मी तर पहिल्यांदाच ऐकला हा शब्द. >>> काय म्हणता!!!!??? आमच्याकडे तर नेहमीच म्हणतात बुवा!!
'टकाटक' हा बहुउपयोगी शब्द आहे. त्याला आपण कसाही आणि कुठेही वापरू शकतो. कसा वापरायचा त्याची एकदोन उदाहरणे मी तुम्हाला सांगतो.
१) त्या गवंड्याचं काम एकदम 'टकाटक' असतं बरं!! (तो गवंडी उत्कृष्ट काम करतो)
२) साडीमध्ये आज काय मस्तं दिसत होती रे ती, एकदम 'टकाटक'!! (साडीमध्ये ती आज फार सुंदर दिसत होती.)
३) त्याने गाडी काय मेंटेन केली आहे बाप!! एकदम 'टकाटक'!!! (त्याने गाडी एकदम कंडिशनमध्ये ठेवलीय)
समजलं ना कसं!!? तुम्हीही 'टकाटक' हा शब्द वापरत जा बरं! फार मज्जा वाटेल बघा बोलताना. आणि आपल्याला काय सांगायचंय ना, ते समोरच्याला ह्या एका शब्दात बरोब्बर समजतं. त्याला जास्त काही सांगायची गरजच पडत नाही.
तर वाचकहो! असा आहे 'टकाटक' शब्दाचा महिमा. मग बोलताना वापरणार ना हा शब्द? बिनधास्त वापरा आणि त्यातून किती आनंद मिळतो पहा. पण मला आपला अनुभव कळवायला विसरू नका बरं!
No comments:
Post a Comment